- 繁體中文
- English
防疫資訊
Only Available in Chinese
防疫資訊
為使大眾掌握實用的防疫資訊，本會特意搜羅坊間及專家的防疫建議，推廣正確的防疫知識。部分資訊更以少數族裔語言發布，不分種族，齊心抗疫。
【同心抗疫】
疫情期間，好多低收入家庭都面對失業，陷入經濟困難，每日可能都要為一日三餐而煩惱。有見及此，YMCA佐敦會所派出義工到街市向商販收集剩菜及水果，分發給居於該區劏房戶及有需要家庭，期望大家能守望相助，共渡時艱。我哋會喺香港電台31台《日常八點半》分享呢個計劃嘅點滴，記得收睇啦！
2020-11-17
【社企網上虛擬展銷會】
疫情之下，你可以足不出戶，只要透過手機或電腦，就可以享受網上虛擬展銷會購物嘅樂趣！YMCA社企 YM Balloon 及 YM Fleur 花樂誰家 參加咗由 HKCSS 香港社會服務聯會 主辦嘅「振興經濟，香港網上虛擬展銷會 2020」。展銷由即日起至12月31日。想睇吓我哋嘅最新產品？即刻click入以下連結，直接去到我哋嘅展銷專頁啦！
2020-11-16
【消毒雙手正確方法】
除咗帶口罩，外出時我哋仲要經常用酒精搓手液消毒雙手。你又知唔知，點先算係正確嘅消毒雙手正確方法？一齊睇吓YMCA為您準備嘅呢條影片，跟住步驟搓足20秒，手上嘅細菌病毒就走唔甩啦！
2020-09-15
【正確佩帶口罩】
新冠肺炎普及社區檢測今日完結，每日新確診數字仍然維持雙位數增長。疫情持續，大家唔好鬆懈！日日都要戴嘅口罩，點先算戴得啱呢？YMCA特意準備咗呢條新影片，一步步同您重溫戴口罩嘅正確方法！即刻去片啦！
2020-09-14
【幫助基層兒童開學】
疫情之下，開學變得不一樣。學童要進行網上學習，電腦、網絡服務變得不可或缺。對於基層家庭而言，各種網上學習配套都會對家庭經濟加添負擔。有見及此，YMCA喺疫情期間特意為基層家庭提供網上學習支援，例如回收舊電腦、派發免費上網SIM咭等。
2020-09-04
【暑期Net活動】
就算唔出街，YMCA都可以陪你開心放暑假！我哋各區嘅會所都會推出唔同嘅網上活動，透過Zoom、facebook直播等，同你一齊玩吓、開心吓！今日介紹佐敦會所 嘅幾個網上活動，有興趣參加嘅就快啲打電話去問吓啦！
2020-08-09
【視像陪你放暑假】
想幫小朋友解下悶，搵d嘢玩吓？ 推介大家參加 佐敦會所 嘅Zoom暑期活動啦，有得學嘢、有得玩。想參加好簡單，家長親身嚟中心報名，拎埋材料包返屋企就ok！如果有興趣參加，請致電2781 1411查詢。
2020-08-09
【Zoom住學手語】
呢個暑假冇得出去玩，不如留喺屋企學啲新技能啦！YMCA聯青聾人中心嘅手語主題學習班開始接受報名啦，就算完全冇學過手語都可以，仲係用Zoom教學，唔使周圍走。名額有限，快啲報名啦！
2020-08-07
【入營清單】
社區感染個案好似越來越多，萬一被列為密切接觸者，就要到檢疫中心隔離14日。隔離營有提供基本嘅生活用品，例如：電視、電熱水煲、風扇、風筒、衣架、餐具、牙膏牙刷及廁紙等。營內除咗供應一日三餐，可另外領取餅乾、杯麵及紙包飲品。而以下呢啲用品，就最好自己帶去，以備不時之需啦！
2020-08-06
【暑假陪你玩】
咁辛苦先捱到暑假，點知又係無得出街玩﹗唔使擔心，YMCA學校社工部為你推出陪你在家活動系列，除左陪你玩桌遊、砌模型，仲陪你畫畫兼靜觀，全部免費呀﹗想參加，快啲入嚟報名啦﹗
2020-08-05
【外賣】
今日開始無堂食，大家lunch食乜？Share上嚟丫！ 疫情反覆，一啲行動不便嘅長者，想落街買外賣都唔係咁容易。YMCA社企餐廳青新駅就再次推出「安心送餐服務」，低至HK$30就有一餐，由本餐廳同工直送到戶。
2020-07-28
【同心抗疫】
疫情似有反彈嘅跡象，大家唔好鬆懈，堅持同心抗疫！YMCA喺過去半年積極進行社區抗疫活動，派發口罩、搓手液、漂白水等物資，亦喺安全嘅情況之下進行探訪，或進行電話訪談，關懐弱勢社群。我哋會繼續同大家一齊抗疫，希望疫情盡快緩和！
2020-07-10
【與你同行】
學校無限期停課，經濟環境又唔好，疫情對一家人嘅生活、情緒、健康都帶嚟好多挑戰。YMCA特意整合咗呢份家長資源包，入面有提昇夫婦及親子關係嘅建議、尋求經濟或物資援助嘅方法及抗逆小貼士。快啲Download再share埋俾朋友啦！
2020-04-21
【全球抗疫】
世界各地YMCA除咗致力於社區進行抗疫工作，亦都經常互相分享實用資訊，共同抗疫。我哋就將一系列抗疫資訊海報分享到@World YMCA ，用簡單易明嘅方式，令大眾更加了解COVID-19，好好保護自己及親人。
2020-04-13
【持續支援】
全球疫情持續，世界各地YMCA亦堅持支援，繼續服務社區。YMCA Latin America and Caribbean 喺疫情期間持續為當地弱勢社群提供食物等基本物資，共渡時艱。
2020-04-13
【免墮致肥陷阱】
專家話咳嗽飛沫嘅射程可以有成8米咁遠，又有「禁聚令」，加上要留家工作，不少家庭都會準備大量零食，兼以罐頭及即食麵「充饑」。澳洲註冊營養師兼香港認可營養師學院認可營養師林思為提醒，罐頭及即食麵營養價值低兼高鈉高熱量，大家應少食為妙。
2020-04-01
【全方位支援學生】
疫情停課期間， 中華基督教青年會小學 為學生準備咗一系列網上學習資源，包括語文、數學、常識、音樂、體育、視藝及生命教育等。學校又為學生提供免費上網卡、Wifi蛋及ipad借用，令學生可以安心在家學習。
2020-03-31
【口罩保存法】
一般口罩嘅保質期有3至5年，但保存嘅環境就好關鍵，因為口罩受潮就會影響功效！如果口罩無獨立包裝，最好就用密實袋，將一盒口罩分成幾小包，避免口罩受潮或被污染。
2020-03-20
【注意手機清潔】
大家都知清潔雙手好重要，但其實清潔手機都好重要，因為病毒可以喺光滑物件表面上存活長達7至9日！手機當然唔係用水洗，只要用70%酒精消毒紙巾或手機屏幕專用濕紙巾，輕輕擦拭手機表面就可以，記得避開有孔位置呀！仲有，記得唔好直接向手機噴灑清潔劑，同埋唔好用漂白水抹手機呀。
2020-03-18
【漂白水 咪亂裝】
樓下有漂白水派呀，攞個飲品膠樽去裝？NO！有機會釋放毒素！要裝漂白水，就要認住「2」號膠樽。 呢隻HDPE高密度聚乙烯膠樽係比較硬身，樽底會有一條橫接口，兼且有列明回收條碼，一般洗衣液以及個人護理產品都係用呢款膠樽。當然，最好就用返漂白水膠樽就最安心啦！
2020-03-02
【環保家居清潔法】
屋企有養寵物，唔敢用太多化學清潔劑？你可以用稀釋醋(醋與水比例為１比１)或食用梳打粉(500毫升清水混合兩匙梳打粉)製成環保清潔劑，既能清潔家居又可以確保家中毛孩安全。
2020-03-01
【齊心抗疫】
早前有印尼人及印度人先後向有需要人士派發口罩，讓愛傳播。病毒的確無分種族，只有齊心抗疫，先可以打贏呢場仗。多啲關心身邊嘅少數族裔人士，提提佢哋注意手部清潔衛生，避免病從口入。天晴會所就特意準備咗呢條烏都語嘅洗手教學片，Share出去啦！
2020-02-21
【U形渠管】
除咗洗手﹗洗手﹗洗手﹗仲要記得倒水入廁所U形渠管防病毒散播。但要記住，清水就足夠，唔駛次次都倒漂白水嘅！仲有，唔好為咗殺菌就用高濃度漂白水清潔間屋，影響環境之餘更有機會中毒呀! 一齊睇下中大生命科學學院副教授陳竟明嘅講解。
2020-02-19
【Home Office, Home Learning】
Work from home唔係咁易嘅！對於好多家長嚟講，WFH最大嘅挑戰係先要安排好仔女嘅活動。坊間有好多網上學習資源同遊戲，家長們不妨好好利用。
2020-02-17
【無晒洗手液點算？】
疫情持續，市面口罩、洗手液被搶購一空，若然買唔到洗手液，不妨改用番梘。有學者試過將大腸桿菌及綠膿桿菌種喺番梘上，然後搵16個人用有菌梘洗手，但洗完手後，竟然各人雙手都無菌﹗雖然番梘及水不能殺病毒，但無論世衛、國家疾病預防控制中心以及美國疾病控制預防中心 ，都有建議市民以番梘及流水洗手，沖走啲細菌同病毒，以減低傳播機會。
2020-02-12
【消毒酒精】
為防肺炎病毒，好多人都買咗高濃度酒精旁身，但消毒還消毒，留意返酒精係易燃嘅！ 小心使用消毒酒精：
- 切忌在室內以噴灑方式消毒，應採取擦拭方法，並保持室內通風。
- 不要往身上噴灑酒精，衣服靜電也有可能引發燃燒。
- 室外噴灑消毒酒精濃度亦不能太高，減低遇上明火產生的風險。
- 吸煙人士要格外小心，煙蒂要徹底弄熄及不能亂掉，碰上酒精後果不堪設想。
2020-02-20
【防疫基本功】
日日睇住個新型肺炎確診數字，真係令人擔心！面對疫情，其實有好多基本嘢可以做，例如注意家居清潔、到人多嘅地方戴口罩等。睇落好似好簡單，只要做到足，就可以有效降低傳染風險。一齊睇下衞生署衞生防護中心嘅建議，從生活各方面著手對抗疫症！
2020-02-20
【防疫貼士】
疫情發展難以預計，能夠掌握更多有用資訊，對防疫工作有一定幫助。如果你身邊有少數族裔、外籍家庭僱工等唔熟識中文嘅朋友，不妨分享以下由衛生署發放嘅正確洗手方法及佩戴口罩指引俾佢哋，增強大家嘅防疫意識。
(印尼文版) https://www.chp.gov.hk/tc/wapdf/34122.html?page=1
(泰文版) https://www.chp.gov.hk/tc/wapdf/34138.html
(菲律賓文版) https://www.chp.gov.hk/tc/wapdf/34134.html
(尼泊爾文版) https://www.chp.gov.hk/tc/wapdf/34126.html?page=1
(印度文版) https://www.chp.gov.hk/tc/wapdf/34113.html?page=1
(巴基斯坦文版) https://www.chp.gov.hk/tc/wapdf/34132.html
2020-01-30
【勤洗手】
身體健康真係好重要，大家都要好好保護自己，除咗出入戴口罩之外，亦都要勤洗手，盡量避免用手接觸眼、口、鼻。如果家中有小朋友及老人家，就更要格外小心，提醒家人多做清潔消毒，防止疾病傳播。
2020-01-29
Chinese YMCA of Hong Kong © 2024